Опозицискиот СДСМ преку официјално соопштение реагираше на отворањето предмет против поранешниот потпретседател на партијата и екс-градоначалник, Стефан Богоев. Од СДСМ тврдат дека станува збор за монтиран случај и директен политички прогон, со цел да се дефокусира јавноста од критиките кои доаѓаат од Европската Унија и падот на рејтингот на владејачката партија.
Од опозицијата потенцираат дека овој процес симптоматично се отвора токму на денот кога во земјава пристигна претседателот на Европскиот совет, Антонио Кошта.
„Кошта го потврди она што го говори СДСМ и порача дека без внесување на малцинствата во Уставот нема поместување од мртва точка. Ова е обид за дефокусирање од критиките што доаѓаат од ЕУ, откако уште еднаш се потврди дека Македонија стои во место поради криминалот и корупцијата на власта и поради неспроведувањето на реформите“, се вели во соопштението на СДСМ.
Обвинувања за партизирано правосудство и копирање на српските методи
СДСМ упати сериозни обвинувања до премиерот Христијан Мицкоски, тврдејќи дека тој директно ги организира и јавно ги најавува апсењата преку собраниската говорница, телевизиските настапи и преку телефон, со што се потврдуваат сомнежите за целосно политичко влијание врз правосудниот систем.
„Оваа техника – прво најава, потоа апсење, па водење кампања против опозицијата – Вучиќ ја практикува со години. Мицкоски и тука работи по принципот copy-paste. Кога знаеме дека ВМРО изгуби околу 150.000 гласа и дека поради лагите на Мицкоски неговиот рејтинг сериозно опаѓа, граѓаните можат само да помислат дека и ова е уште една од познатите ПР-кампањи на ВМРО и организираната криминална група“, реагираат од опозицијата.
Низа неодговорени скандали и барање за независен систем
Во реакцијата на опозицијата се наведува дека додека власта режира спектакли и политички театар за јавноста, клучните прашања и корупциски скандали нотирани од нивна страна остануваат без институционален одговор.
Од СДСМ потсетуваат дека со месеци нема разрешница за петте тони дрога кои ја поминаа границата, како и за низата случаи кои ги објави нивниот Антикорупциски тим. Меѓу нив се споменуваат 161 тендер за семејната фирма на Томовски, 93 тендери за Мастеф, 51 тендер за „Пирамид Билдинг“, 74 тендери за „Ленди Груп“, доделување на 9 милиони евра за фирма со двајца вработени, како и тендерот од 1,2 милиони евра преку Пошта за фирма блиска до партијата ЗНАМ.
На крајот од соопштението, СДСМ порачува дека на државата ѝ се потребни независно судство, независно обвинителство и отворена соработка со Европското јавно обвинителство, за да може секој што згрешил пред законот да одговара без разлика на функцијата и партијата. Токму затоа, како што велат, опозицискиот Фронт се обединил околу заедничкиот Антикорупциски закон, со порака дека законот мора да биде еднаков за сите.