Светските резерви на нафта се намалени на најниско ниво во последните повеќе од две децении, предупреди американската Администрација за енергетски информации (EIA), наведувајќи дека залихите во развиените економии се на најниско ниво од 2003 година.
Според најновите прогнози на EIA, глобалните резерви ќе продолжат да се намалуваат и во наредните месеци. Агенцијата проценува дека во вториот квартал светските залихи ќе се намалуваат со темпо од 6,3 милиони барели дневно, додека во третиот квартал падот би можел да достигне 7,66 милиони барели дневно.
Една од главните причини за ваквата состојба е нарушениот поморски сообраќај низ Ормускиот теснец – една од најважните светски рути за транспорт на сурова нафта. Поради неизвесноста во снабдувањето, бројни држави ги активираа своите комерцијални и стратешки резерви.
Како последица, залихите на нафта во 38-те земји членки на ОЕЦД паднаа на најниското ниво во последните 22 години. Во исто време, значително се зголеми побарувачката за американска нафта како алтернатива на испораките од Блискиот Исток.
Според EIA, нето-извозот на сурова нафта и нафтени деривати од САД во април достигнал рекордни 5,8 милиони барели дневно. Американските власти очекуваат просечниот нето-извоз годинава да изнесува околу 4,2 милиони барели дневно, што е значително повеќе во однос на минатата година.