Претседателот на Владата, Христијан Мицкоски, одговарајќи на новинарски прашања поврзани со реализацијата на кредитната линија за поддршка на стопанството и најновите економски показатели, најави дека е заокружена исплатата на средствата наменети за домашните претпријатија. Мицкоски информираше дека минатата недела се префрлени околу 120 милиони денари, со што вкупната сума распределена од почетокот до денес изнесува 230 милиони евра. Станува збор за средства кои во јавноста се познати како дел од унгарскиот кредит, а премиерот подвлече дека Владата, покрај привлекувањето на странски директни инвестиции, останува силно посветена на поддршката на домашните претприемачи, индустрија и економија, соопштуваат од Владата.
Кредитната линија се реализира под исклучително поволни услови, со субвенционирана каматна стапка од 1,95 проценти, грејс период од 3 години и рок на отплата до 12 години. Премиерот потенцираше дека преку ваквиот модел на финансирање, извршната власт очекува барем двојно зголемување на финалната сума кога станува збор за вкупните инвестиции кои домашните компании ќе ги реализираат во земјава.
Индустријата закрепна по шокот од енергетската криза во март
Ваквата финансиска поддршка, според зборовите на Мицкоски, веќе дава директни резултати на терен, што се рефлектира и во најновите податоци за прометот во индустријата за месец април. Премиерот појасни дека домашното стопанство успешно се консолидирало по сериозниот економски шок во март, кога поради војната во Заливот ескалираше најголемата енергетска криза што човештвото ја памети во овој милениум, која според експертите е поголема од последните три енергетски кризи заедно.
И покрај глобалните притисоци, во април годинава консолидираната индустрија забележа значаен раст од 7,4 до 7,5 проценти во вкупната размена, споредено со истиот месец од минатата година. Мицкоски порача дека овие позитивни економски показатели се лоша вест за структурите кои не ѝ мислат добро на земјата и кои преку лажни вести се обидуваат да креираат паника, хистерија и манипулации во јавноста. Тој заклучи дека македонската економија забрзува и покрај сите предизвици.