Од 15 јули 2026 година, Амбасадата на Соединетите Американски Држави во Скопје воведува целосно електронски систем за плаќање на конзуларните услуги за американските државјани, со што повеќе нема да се прифаќаат плаќања на шалтер.
Според известувањето на Амбасадата, готовина, кредитни картички и какви било други форми на плаќање повеќе нема да бидат прифатени при поднесување барања за услуги како што се издавање пасоши и нотарски услуги. Наместо тоа, сите плаќања ќе треба однапред да бидат извршени преку официјалниот владин портал Pay.gov, пред закажаниот термин во Амбасадата.
Од Амбасадата потсетуваат дека по извршената уплата, корисниците задолжително треба да ја отпечатат електронската потврда за плаќањето од Pay.gov и да ја понесат со себе на денот на закажаниот термин.
Повеќе информации за новиот начин на плаќање и за конзуларните услуги се достапни на веб-страницата на Амбасадата на САД во Северна Македонија: https://mk.usembassy.gov/services/.