8
Во соопштение на руското Министерство за одбрана се наведува дека единиците за противвоздушна одбрана во недела, меѓу 20 и 23 часот, пресретнале 148 дронови. Градоначалникот на руското црноморско пристаниште Новоросијск, Андреј Кравченко, извести дека остатоци од дрон погодиле висока станбена зграда. Засега нема информации за жртви.
Гувернерот на Севастопол, пак, соопшти дека овој пристанишен град на анектираниот полуостров Крим во текот на денот бил изложен на напади од четири дрона, а во најновиот бран биле соборени уште седум.
Исто така, во окупираната Донечка област на истокот од Украина, лидерот на самопрогласената власт, Андреј Чертков, изјави дека службите за итни случаи по украинските напади врз енергетската инфраструктура повторно ја воспоставиле електричната енергија во два големи града – Доњецк и Макеевка. Чертков претходно изјави дека речиси половина милион домаќинства останале без струја.
Службите исто така работеле на обновување на снабдувањето со електрична енергија по масовните прекини во областите од Запорошкиот регион под руска контрола, пренесува Ројтерс. Агенцијата извести и дека во неделата навечер беспилотно летало убило волонтер на цивилната заштита во руската погранична област Белгород, честа цел на украинската војска.