2
Претседателот на иранскиот парламент, Мохамед Бакер Калибаф, остро ги осуди, како што рече, израелските воени злосторства против иранскиот народ и Палестинците во Газа, велејќи дека „нацистите од 21 век мора да бидат запрени“.
„Газа не е само точка на картата, туку тест за човечката совест. Не смееме да бидеме минувачи на геноцидот во Газа. Мора да ги запреме нацистите од 21 век пред да биде предоцна“, рече Калибаф на Шестата светска конференција на претседатели на парламенти во Женева.
Тој оцени дека идеалот за мултилатерализам, мир и правда е „намерно поткопан“, додека во исто време „кредибилитетот на меѓународните институции се намалува“, објави иранскиот портал Мехр.
Калибаф потсети дека Иран неодамна беше цел на јасна воена агресија од страна на ционистичкиот режим, спроведена со поддршка на Соединетите Американски Држави. Тој, исто така, го критикуваше молчењето на меѓународните институции, вклучително и Меѓународната агенција за атомска енергија (МААЕ), во врска со овие настани.
„Оваа агресија не следеше по неуспехот на дипломатијата, туку во средината на политичките преговори. Иран беше на преговарачката маса и беше посветен на дијалог, но напаѓачите беа тие што ја превртија масата и избраа поинаков пат, а како одговор, Иран решително ја бранеше својата територија и својот народ“, истакна Калибаф.
Тој додаде дека чинот на агресија од страна на ционистичкиот режим, како намерно кршење на меѓународното право и Повелбата на Обединетите нации, беше осуден од 120 земји низ целиот свет.
„Мал, но насилен ционистички поддржувач ги спречи меѓународните тела да преземат решителни мерки за казнување на криминалниот Израел. Дали знаете какви ќе бидат последиците од неказнивоста на ционистичкиот режим?“, праша тој.
Калибаф, исто така, зборуваше за хуманитарната катастрофа во Газа, велејќи дека ционистите го користат гладот како оружје за масовно уништување.
„Газа денес е музеј на злосторства против човештвото и лабораторија за тестирање на смртоносни технологии; место каде што правото на живот се казнува со куршуми и глад“, рече претседателот на иранскиот парламент.