16
Албанскиот премиер Еди Рама, упати ултиматум до претприемачите, кои имаат свои бизниси покрај националните патишта, до 31 јули, да отстранат секаков вид материјал, што се наоѓа на помалку од 20 метри од коловозот.
Преку објава на социјалните мрежи, Рама наведува дека ова треба да биде и законската безбедносна дистанца, порачувајќи дека „ќе има казнени мерки за бизнисите што нема да го испочитуваат рокот”.
-Паралелно со рушење на дивоградбите и ослободување на јавниот простор во населените места, започнаа напорите за ослободување на националните патишта од различните видови бизниси по должината на патот. Бизнисите по должината на сегментите од патот имаат рок до 31 јули да отстранат секаков вид материјал што се наоѓа на помалку од 20 метри од коловозот, што е и законската безбедносна дистанца – со исклучок на зградите изградени со дозвола, но не и материјалите во нивните дворови, чии огради исто така ќе треба да се повлечат до максимална можна мера, според проектот што подоцна ќе им го достави Агенцијата за патишта, напиша Рама.
Тој објавува фотографија од складиште со градежен материјал како пример дека тоа повеќе нема да се дозволи. Тоа важи и за складови на стари возила и се што го попречува слободното движење и одвивање на сообраќајот.
„Албанија сега чука на вратата на Европската Унија и оваа преодна фаза на вршење економска активност на штета на заедницата и животната средина како целина, како и безбедноста во сообраќајот на националните патишта, особено, треба да се смета за затворена. Од сите и со најголемо национално разбирање, за Албанија 2030 во ЕУ“, нагласува Рама.
По негова наредба акцијата за уривање на дивоградби започна во туристичкото планинско место Тет, каде беа урнати стотина објекти, а во Тирана, речиси целосно е ослободен нелегално запоседнатиот јавен простор пред кафулиња, ресторани, поставени гаражи и други објекти