18
Познатиот хрватски истражувачки новинар Домагој Маргетиќ тврди дека има документи што ја откриваат улогата на Александар Вучиќ во военото Сараево во текот на 1990-тите.
„Информацијата напишана и потпишана од Славко Алексиќ како командант на Новосараевскиот четнички одред во ноември 1993 година дополнително го открива учеството на Александар Вучиќ во човечкото сафари во воено Сараево. Имено, во документот, Алексиќ ѝ наведува на командата на одредот дека извесен италијански гостин Р.Р. донирал дваесет илјади германски марки на одредот, а донацијата му ја предал на Алексиќ волонтер на одредот, Александар Вучиќ. Што мислите, Италијанец би дошол на еврејските гробишта во Сараево за време на војната и би „донирал“ таква сума пари на волонтерите на одредот? Повеќе од јасно е дека станува збор за плаќање за услуги, што самиот Алексиќ го потврдува во документот, во делот каде што наведува дека волонтерите на одредот кои обезбедувале логистика на странските гости би добивале додаток на плата од педесет германски марки од оваа сума“, изјави Маргетиќ.
Според него, документите што ги поседува вклучуваат наредби за овозможување слободно движење на Вучиќ и гостите на Одредот, како и други материјали од воената архива на Славко Алексиќ.
„Овие документи ми ги дадоа другарите на Славко Алексиќ, на кои тој им довери дел од својата архива „во случај да му се случи нешто“. Откако тој одеднаш „почина“, потпомогнат од агентите на БИА на Вучиќ, неговите другари ми предадоа голем дел од таа архива“, додаде Маргетиќ.
За потсетување, случајот познат како „Сараево сафари“ се однесува на наводната практика на носење странски гости во воено Сараево во текот на 1990-тите за да ги набљудуваат борбите и, според истражувачите, да учествуваат во стрелањето на цивилите во Сараево.
Маргетиќ нагласи дека документите што ги објавил дополнително укажуваат на улогата на одредени волонтери на Одредот во логистиката на овие активности.