33
Американското Министерство за правда објави милиони нови документи поврзани со починатиот сексуален престапник Џефри Епстин, што претставува најобемно јавно обелоденување на материјали откако минатата година со закон беше наложено нивно објавување. Документите повторно го отворија прашањето за размерите на мрежата поврзана со Епстин, при што се споменуваат и лица и настани поврзани со регионот на Балканот.
Според податоците, станува збор за околу три милиони страници документи, 180.000 фотографии и околу 2.000 видео-снимки. Во нив се наведуваат и имиња на бројни јавни личности од светската политичка и бизнис елита, меѓу кои и Бил Гејтс, Бил Клинтон, норвешка принцеза, како и поранешниот британски принц Принц Ендру.
Една жена во документите тврди дека Епстин ја испратил во Обединетото Кралство на сексуална средба со принцот Ендру, наводно во 2010 година. Кралски коментатори наведуваат дека новообјавените материјали дополнително ги доведуваат во прашање претходните негирања за поврзаноста со Епстин.
Имиња, но и контроверзии
Името на актуелниот претседател на САД, Доналд Трамп, во документите се споменува повеќе од илјада пати, објави Би-Би-Си. Трамп најави можна тужба против писателот Мајкл Волф, обвинувајќи го дека пласирал наводи за негова поврзаност со Епстин со политички мотиви.
Во објавените електронски пораки се споменува и Илон Маск, кој во 2013 година разменувал пораки со Епстин во врска со можна посета на неговиот карипски остров. По објавувањето на документите, Маск изјави дека најважно е кривично да одговараат оние кои навистина извршиле злосторства, предупредувајќи дека без апсења целата постапка може да се сведе на „одвлекување внимание“.
Регионален аспект и жртви од Србија
Дополнителен интерес предизвикаа наводите дека меѓу жртвите имало и девојки од Србија. Игор Јуриќ од Центарот за исчезнати и злоупотребувани деца изјави дека за првпат во документите се спомнуваат и девојки од Белград, што, според него, е клучна информација.
Тој посочи дека дел од т.н. „безбедни куќи“ се наоѓале во Будимпешта и Виена, од каде девојките биле префрлани понатаму во Париз, а потоа и во Соединетите Американски Држави, често преку агенции за моделирање.
Во документите се појавуваат и имиња познати во регионот, меѓу кои Мило Ѓукановиќ и Мирослав Лајчак. По објавувањето, Лајчак се повлече од функцијата советник на словачкиот премиер.
Сомнежи за целосно расветлување
Адвокатите кои застапуваат десетици наводни жртви предупредуваат дека во дел од документите не биле заштитени нивните идентитети, што дополнително ги изложува на ризик. Тие побарале итно отстранување на дел од материјалите од веб-страницата на Министерството за правда.
Според Јуриќ, и покрај обемот на објавените документи, истрагата сè уште не ја открива целосната слика. „Имињата на жртвите се видливи, но најголем дел од моќните луѓе кои ги злоупотребувале тие жртви и натаму се цензурирани. Поради тоа, останува прашањето дали случајот Епстин некогаш ќе биде целосно расветлен“, заклучува тој.