22
Претседателската резиденција на езерото Валдай сега има вкупно 27 кули опремени со противвоздушни системи „Панцир“, покажува истрагата на Радио Слободна Европа заснована на сателитски снимки, пишува „Телеграф“.
Системите „Панцир“, познати како „убијци на беспилотни летала“, чија цена по единица достигнува и до 19 милиони евра, се сметаат за едно од најдобрите руски решенија за соборување на мали, брзи и нисколетачки цели. Безбедносните мерки околу резиденцијата Валдай, оддалечена околу 300 километри од Украина, значително се зајакнати поради загриженоста од сè поголемите способности на Киев за напади со беспилотни летала со долг дострел.
Во 2024 година околу комплексот имало само седум противвоздушни кули, што е приближно четвртина од денешниот број, а изградбата на уште седум нови кули започнала на 17 март. Распоредот на системите наводно е пресликан од оној околу Москва, со „Панцир“ системи поставени во два прстена околу вилата.
За споредба, целото метрополитенско подрачје на Москва, со околу 20 милиони жители, минатата година имало само 60 вакви системи, што е едвај малку повеќе од двојно од бројот што сега го опкружува засолништето на Путин.
Во последните години Путин сè повеќе време поминува во своето изолирано засолниште на Валдай. Се верува дека тоа е и дом на неговата наводна долгогодишна партнерка Алина Кабаева, поранешна олимписка гимнастичарка во ритмичка гимнастика.
Се смета дека луксузната дача и инаку е добро заштитена, бидејќи се наоѓа на полуостров, меѓу две езера и е опкружена со густа шума, што помага во заштитата од беспилотни летала.
Исто така се верува дека комплексот Валдай содржи бункер и верна реплика на кабинетот на Путин од Кремљ, што му овозможува да ја прикрие својата вистинска локација за време на видеоповици или јавни обраќања.
Истражувачкиот портал „Проект“ претходно тврдеше дека во рамките на имотот има и крио-комора, солариум, хамам, просторија за третмани со кал и низа приватни медицински содржини. Истражувањата на опозициските руски медиуми од 2023 година открија дека Путин до своите резиденции, вклучително и онаа на Валдай, патувал со оклопни возови.
Претходно овој месец рускиот претседател го засили обезбедувањето и околу својата резиденција „Бочаров Ручеј“ во Сочи, која не ја посетил од есента 2025 година. Според истражувачкиот портал „Агентство“, руската Федерална служба за заштита предложила нова безбедносна зона што се простира на повеќе од три квадратни километри околу имотот, и на копно и на море. Во рамките на таа зона се забранети летови со дронови, сидрење на пловни објекти, поправки на возила, одлагање отпад и поставување транспаренти или стрелишта.
Според Радио Слободна Европа, претходно оваа година биле изградени и дваесет кули за противвоздушна одбрана со тешки митралези и неколку системи „Панцир“ околу специјалната економска зона Алабуга во Татарстан.
Во тој комплекс се наоѓа најголемиот светски погон за производство на ирански камиказа-дронови „Шахед-136“, кој произведува илјадници летала месечно и често е цел на украински напади.
„Панцир“ спаѓа во краткодометни системи за противвоздушна одбрана наменети за заштита на клучни објекти и воена инфраструктура од закани од воздух. Станува збор за комбиниран систем што обединува топови и ракети на едно мобилно возило, што му овозможува брза реакција на различни цели како дронови, крстосувачки ракети, хеликоптери и нисколетачки авиони.
Особено е ефикасен против мали и брзи цели на ниски височини. „Панцир“ може истовремено да следи повеќе цели и да дејствува во движење, а често се користи како завршен слој на одбрана околу важни локации, дополнувајќи ги системите со долг дострел.
Сепак, системите „Панцир“ далеку од тоа дека се неуништливи. Украинската служба за безбедност во февруари соопшти дека во напади со долг дострел врз воена инфраструктура во московскиот регион уништила половина од руските резерви од овие системи.