„Ова е момент кога еден град се гледа себеси со нови очи и кога ја гради својата иднина преку културата. Ова е можност да создадеме нова приказна за Скопје — приказна на отвореност, соработка и заедништво. Ова не е проект на институциите. Ова е проект на луѓето. На сите нас“, истакна министерот за култура и туризам Зоран Љутков во своето воведно обраќање на конференцијата „Скопје – Европска престолнина на културата 2028“, што денеска се одржува во главниот град, пренесуваат од Министерството за култура и туризам.
На конференцијата посветена на еден од најзначајните стратегиски проекти за нашата земја, министерот Љутков, во присуство на евроамбасадорот, градоначалници и делегации од градовите партнери, претставници на меѓународни институции, академската заедница, како и многубројни домашни и странски гости, нагласи дека Скопје има историска шанса да се афирмира како современ европски културен центар.
Љутков потенцираше дека проектот ја има целосната и недвосмислена поддршка од Владата, предводена од премиерот Христијан Мицкоски, која обезбедува институционална, финансиска и политичка стабилност за неговата реализација.
„Поддршката е силна и јасна – таа значи континуитет, координација и сигурност дека оваа визија ќе се реализира“, истакна тој.
Говорејќи за значењето на титулата Европска престолнина на културата 2028, министерот посочи:
„Не зборуваме само за титула. Зборуваме за процес што го менува градот – за нова енергија, за нови културни простори и за можност Скопје да стане вистинска точка на поврзување во Европа.“
Тој додаде дека оваа иницијатива не е насочена само кон 2028 година, туку кон долгорочна трансформација:
„Ова што го градиме денес ќе се чувствува и по 2028 година — како нов културен импулс, како нов начин на живеење на градот.“
Во таа смисла, беа истакнати и конкретни проекти за унапредување на културната инфраструктура, меѓу кои ревитализацијата на Скопското кале, заштитата на Скопскиот аквадукт, обновата на Универзална сала, оживувањето на локалитетот Скупи, како и создавање нови културни простори, што ќе им припаѓаат на граѓаните.
„Европа не е само политика — Европа е култура, идентитет и заедничко чувство на припадност. Скопје 2028 е нашата можност тоа јасно да го покажеме“, порача министерот Љутков.
Конференцијата продолжува со панел-дискусии посветени на културата, урбаните политики и развојот на одржливи европски градови, со фокус на зајакнување на соработката и размена на идеи.