Авион на RAF во кој се наоѓал министерот за одбрана Џон Хили оваа недела имал блокиран GPS сигнал во близина на руската граница. Хили се враќал во Велика Британија во четврток откако ги посетил британските трупи во Естонија, а се верува дека Русија стои зад блокирањето. Прекинот на GPS ги принудил пилотите да користат алтернативни системи за навигација за време на тричасовниот лет, објави Би-Би-Си.
Инцидентот првпат го објави весникот „Тајмс“. Не е познато дали Хили бил директна цел, но весникот објави дека патеката на авионот била јавно видлива на веб-страниците за следење на летот. Министерството за одбрана е контактирано за коментар.
Понови инциденти
Инцидентот се случува само еден ден откако беше објавено дека два руски борбени авиони имале „повеќекратни и опасни“ пресретнувања на шпионски авион на RAF над Црното Море минатиот месец. Во тој инцидент, руски борбен авион Су-35 се приближил толку блиску до извидувачки авион „Ривет Џојнт“ што биле активирани итни системи, оневозможувајќи го автопилотот.
Покрај тоа, авион Су-27 прелетал шест пати пред британскиот авион, приближувајќи се на шест метри од неговиот нос. Пред инцидентот со попречувањето, Хили бил во Естонија каде што разговарал со припадници на британските вооружени сили кои учествувале во воена вежба на НАТО во близина на руската граница.
Хили го пофалил „извонредниот професионализам“ на екипажот на RAF за време на она што тој го нарекол „неприфатливи“ руски прелети. Министерството за одбрана ги опиша прелетите како најопасната руска акција од 2022 година, кога „нечесен“ руски пилот испалил ракета кон авион „Ривет Џоинт“ над Црното Море.
Ова не е прв пат авион што превезувал британски функционер да доживее попречување. Во 2024 година, авион на RAF што го превезувал тогашниот министер за одбрана Грант Шапс, исто така, имал блокиран GPS сигнал додека летал во близина на руска територија.