Комисијата за култура на СДСМ преку писмена реакција изрази сериозно незадоволство по вчерашната прес-конференција на Владата во врска со организацијата на прославата за 35 години независност на државата. Од опозициската партија обвинуваат дека јавноста останала без одговори на суштинските прашања за тоа кој, како и по кои критериуми одлучува за трошењето на парите на граѓаните.
Од СДСМ тврдат дека со оваа прослава на дело се покажува оти транспарентноста и отчетноста под раководство на ВМРО-ДПМНЕ се сведени на нула. Наместо јавни повици и институционален пристап, според опозицијата, на сцена е затворен круг на привилегирани поединци и компании, што претставува директно потценување на културните работници и на институциите.
Партијата направи компарација со периодот кога таа дошла на власт во 2017 година, посочувајќи дека тогаш Министерството за култура најтранспарентно ги објавило сите корисници и износи од програмите. Денес, како што велат, државата повторно се враќа на моделот на фаворизирање и нетранспарентност.
Четири клучни прашања до Владата
Во соопштението, Комисијата за култура на СДСМ упати четири директни прашања до извршната власт:
1. По кој критериум е избрана агенцијата „Авалон продукција“ за организација на настанот?
2. По кој критериум сопственикот на приватна компанија добива ексклузивно право да избира кои македонски музички ѕвезди ќе настапуваат на прославата на државен празник?
3. По кој критериум приватна компанија се става на пиедестал над националните институции од областа на културата?
4. Зошто повторно се заобиколуваат институциите и се создава впечаток дека културата е приватен бизнис на блиски структури до власта?
Критика за естрадизација и игнорирање на врвните уметници
Од СДСМ особено потенцираат дека Македонија во моментот располага со врвни уметници од областа на класичната музика кои настапуваат на престижни светски сцени, но државата избира да ги игнорира. Наместо институционален капацитет, според партијата, јавноста сведочи на селективност и естрадизација.
„Прославата на 35 години независна Македонија треба да биде државнички и обединувачки чин, а не уште еден пример за нетранспарентно трошење јавни пари и партизација на културата“, се заклучува во партиската реакција.