Предлог-законското решение за пушењето е донесено по пат на инклузивен процес и консултации со сите засегнати страни, а неговата примена ќе се спроведува строго на целата територија на државата, без какви било повластици. Ова денеска го изјави претседателот на Владата, Христијан Мицкоски, на средбата со претставниците на здруженијата, производителите, дистрибутерите и хотелиерите (Хорека секторот) кои учествуваа во изработката на законот.
Премиерот истакна дека предлогот не е носен ад-хок ниту по принципот на сила, туку преку заеднички компромис кој следната недела, во вторник, ќе се најде на владина седница на разгледување пред министрите.
„Практично, целокупниот овој процес создаде еден производ во којшто целта на Владата беше да излеземе сите подеднакво незадоволни. Затоа што кога работите ваков еден закон не можете да излезете сите подеднакво задоволни, тоа не е возможно. Имаме по малку некое мало ограничено незадоволство, но сите сме среќни затоа што постигнавме заеднички компромис“, објасни Мицкоски.
Мицкоски потенцираше дека една од клучните политики на Владата е борбата за намалување на бројот на граѓани кои консумираат тутун. Тој посочи дека досега во државата имало одредени законски решенија кои, за заложби на јавноста, не биле доследно применувани на терен, но гарантираше дека овојпат пристапот ќе биде радикално поинаков.
„Верувајте ми, инспекциите ќе бидат ригорозни на целата територија на државата. Ова го повторувам, нема да има повластени региони, градови, населени места итн. каде што нема да се почитува законот и за ова јас ви гарантирам, тука ќе нема никаков пардон. Ако некој мисли дека бил повластен, па бил близок со овој или оној, се лаже. Можеби ќе поминете еднаш или двапати, но третиот пат сигурно ќе бидете фатени и санкционирани“, дециден е премиерот.
Одговарајќи на коментарите дека ваквите законски решенија можат да соколат поларизација или да наштетат на политичката репутација, Мицкоски порача дека Владата свесно влегува во овие процеси бидејќи крајната цел е заштита на здравјето и човечките животи.
Како соодветен пример тој го посочи проектот „Безбеден град“, за кој во првите четири месеци од годинава е евидентиран преполовен број на човечки жртви во сообраќајот, токму во зоните каде што овој систем е активен. Премиерот изрази уверување дека и со доследна примена на новиот закон за пушење ќе се постигнат видливи позитивни резултати за јавното здравје.