Директорот на Фондот за здравствено осигурување, Сашо Клековски, соопшти дека со чест и чувство на голема одговорност ја прифаќа номинацијата од премиерот Христијан Мицкоски за нов министер за здравство.
Во објава на социјалните мрежи, Клековски истакна дека изминатите две години на чело на Фондот не ги доживувал само како професионален ангажман, туку како мисија насочена кон подобрување на здравствениот систem
„Секој лек што стана подостапен, секоја политика што ја спроведовме за полесен пристап до здравствена заштита и секој процес што го олеснивме за пациентите и здравствените работници има една цел – подобра грижа за луѓето“, наведува Клековски.
Тој откри дека при денешната посета на Општата болница во Куманово разговарал со пациент кој му пренел дека забележува значителен напредок во здравствениот систем, момент што, како што вели, дополнително го потсетил дека најважни се резултатите што ги чувствуваат граѓаните.
Клековски му се заблагодари на премиерот Мицкоски за довербата и порача дека функцијата ја прифаќа со скромност, свесен за одговорноста што ја носи.
„Ќе работам со срце, посветеност и одговорност за подобро здравство за сите. Министерството за здравство не е само следна функција, туку можност грижата за здравјето на секој граѓанин да стане уште поголем приоритет, а резултатите да се чувствуваат во секој дом и во секоја болница“, истакна Клековски.