Утре стартува третиот круг од тековниот шампионат и се знае дека на официјалната табела по 22.коло Вардар е прв со 55 бодови, втора Шкендија со три помалку, Струга ТЛ има 47, четврти е Силекс…
Инаку во изминатиот дел од пролетната полусезона се одиграа шест кола и во пресрет на стартот на третиот круг убаво ќе биде да видиме како изгледа табелата ако се земат в предвид само овие изминати пролетни шест кола. Тоа е заради да видиме кој во каква форма е пред последните 11 кола.
А на таа провизорна табела, Шкендија е лидер со 16 бодови. Шампионот забележа пет победи и само едно реми со гол разлика 12:4. Ги победи и Вардар и Струга ТЛ и Силекс, а ремизираше само со Брера во последното 22.коло.
Вардар е втор со 13 бодови. Тимот на Гоце Седлоски победи на четири меча а по еднаш ремизираше и беше поразен.
Изненадувачки Тиквеш е трет по овие шест кола. Кавадарчани имаат само бод помалку од Вардар, а до таму стигнаа со четири победи и два порази. Интересно, три победи имаат како гости.
И Башкими е во добра форма кој е на 4. место со 10 бодови. Кумановци имаат три победи, едно реми и два порази. Следуваат Брера со 9 бодови исто колку што има и Работнички.
Не е лоша ни Македонија ЃП со 8 бодови на седмото место. Силекс е осми со 8 бодови и со гол разлика 5:5. Кратовци дома загубија и од Шкендија и од Вардар, а славеа во Струга.
Токму Струга ТЛ е тим од кој се очекуваше многу повеќе а не да освои само шест бода. Пораз од Шкендија и Силекс и реми со Вардар, или само една победа и тоа против Шкупи, три ремија и два порази. Премалку за тим со таков квалитет.
Пелистер е во лоша, да не кажеме катастрофална форма. Битолчани на шест меча освоија само 5 бодови. Тргнаа одлично со победата над Работнички од 4:1, но следуваа две ремија и три порази. Арсими е уште полош со 4 бодови на претпоследната позиција.
Очекувано Шкупи е последен со нула бодови, а нема ни постигнат гол а примил 22.
Па така, ако се гледа оваа табела тогаш Шкендија е шампион, Вардар оди во ЛК а Силекс и Струга ТЛ играат баражи за опстанок, додека Пелистер, Арсими и Шкупи директно се селат во ВМФЛ.
Се разбира ова е само провизорно како што рековме погоре зошто се сметаат резултатите од првите шест пролетни кола.
На крај да каже дека само Пелистер и Шкупи се на истите места, како на официјалната така и на оваа провизорна табела. Битолчани се десетти и на двете табели а чаирчани последни.
Тоа нешто кажува во секој случај.
ТАБЕЛА
1.ШКЕНДИЈА 16 (12:4)
2.ВАРДАР 13 (11:3)
3.ТИКВЕШ 12 (14:5)
4.БАШКИМИ 10 (5:3)
5.БРЕРА 9 (9:6)
6.РАБОТНИЧКИ 9 (10:13)
7.МАКЕДОНИЈА ЃП 8 (8:6)
8.СИЛЕКС 8 (5:5)
9.СТРУГА ТЛ 6 (9:7)
10.ПЕЛИСТЕР 5 (6:6)
11.АРСИМИ 4 (5:14)
12.ШКУПИ 0 (0:22)